Батыс Қазақстан мен Атырау облыстарында Жайық өзеніндегі тасқынның екінші толқыны ерекше бақылауда – ҚР ТЖМ

Батыс Қазақстан мен Атырау облыстарындағы Жайық өзеніндегі тасқынның екінші толқыны ерекше бақылауда, деп хабарлады Төтенше жағдайлар министрлігінің (ТЖМ) өкілі Асқар Шәріп Республикалық ақпараттық штабта өткен брифингте.

«Өңірлерде су тасқынына қарсы азаматтарға хабарлау, су тасқыны салдарын жою іс-шаралары жалғасуда. Батыс Қазақстан және Атырау облыстарындағы Жайық өзенінде Ресей Федерациясынан келетін тасқынның екінші толқыны ерекше бақылауда. Жайық өзенінің су деңгейіне мониторинг жалғасуда, тұрғындарды хабардар ету және телерадио хабарламасы әр төрт сағат сайын жүргізіледі», - деді Асқар Шәріп. 

Спикер атап өткендей, Батыс Қазақстан облысында тәулігіне 81523 қап пен 2770 тонна инертті материал төселіп, бөгеттерді көтеру және нығайту жұмыстары жалғасуда. Атырау облысында 824 мың қап пен 2,7 мың тонна инертті материал төселіп, 4424 шақырым бөгет орнатылып, оларды нығайту жұмыстары жалғасуда.