Басшысының саусағын балтамен шауып тастаған күдікті бостандықта жүр

Қызылорда қаласында дәмханада  кәсіпкер әйелдің саусағын қоластындағы жұмысшысы балтамен жауып, өзін соққыға жыққан деп хабарлайды, Orda.kz.

Кәсіпкер әйел қоғамдық тамақтану орнын жалға алып, адал еңбекпен кәсібін дөңгелетіп отырған. Онда аспаз ретінде жұмыс істейтін ер адам кәуәп дайындаған. Анықталғандай, жұмыс барысында әйел оған қызметтік міндетін дұрыс атқармай, ішімдік ішкені үшін ескерту жасаған.

Заңгер Ғабит Өмірбек бұл іске құқық қорғау органдары ерекше назар аударып, объективті тергеу жүргізіп, кінәлі тұлғаны жауапқа тартуды сұрайды.

Алған жарақаттан келіншектің оң қолының балтамен шабылған  2 саусағы хирургиялық жолмен кесілген. Бел омыртқасы сынып, көп қан жоғалтып,  сіңірі үзілгені белгілі болды.

Заңгердің айтуынша, осыншама ауыр дене жарақаттарына қарамастан күдікті қамауға алынбаған. Оған қоса, оның бұрын сотталғаны да белгілі болды.

«Біз жәбірленушінің ем қабылдау құжаттарына сәйкес сот-медициналық сараптама тағайындадық. Қан іздері мен заттай дәлелдер бойынша соталды биологиялық сараптама жүргізуді талап етеміз. Сонымен қатар, күдіктінің психологиялық жағдайына сараптама тағайындап, аса ауыр құқық бұзушылықты ескере отырып, «күзетпен ұстау» бұлтартпау шарасын қолдануды сұраймыз» деп жазды заңгер Ғабит Өмірбек.