Бас прокурор қаза тапқан сарбаздардың аналарын қабылдауға уәде берді

Бас прокурор Берік Асылов өзінің Х-тегі парақшасында әскердегі баласынан айырылған аналарды қабылдайтынын хабарлады, деп жазады Orda.kz.

Өз сөзінде Асылов олардың әрбір дәлелі назардан тыс қалмайтынын айтты.

«Мемлекет басшысының тапсырмасын орындау мақсатында Бас прокуратура мен Бас әскери прокуратура басшылығы қаза тапқан және жарақат алған әскери қызметшілердің аналарын қабылдайды. Олардың әрбір уәжі назардан тыс қалмайды. Сондай-ақ әскери қызметшілердің қаза табуы мен жарақат алуын болдырмау жөніндегі жұмыстарға, әскери қызметке шақырудың заңдылығына және медициналық қызметтің қорытындыларының негізділігіне баға беріледі. Осы жұмысқа Қорғаныс министрлігі мен Ұлттық ұланның орталық аппараттарының өкілдері тартылды» деп жазды Берік Асылов.

Айта кетейік, кеше ұлдары әскери борышын өтеп жүріп қаза тапқан аналар үкімет үйінің алдында митиң ұйымдастырды. Олар балаларының өлімін әділ тергеуді талап етті. Қасым-Жомарт Тоқаев болған жайттан хабардар болып, Берік Асыловқа қаза тапқан сарбаздардың ісін 12 күн ішінде тексеріп, аяқтауды тапсырған.