Баганашылдағы балалар үйіндегі жанжалдан кейін Алматы облысында екі шенеунік қызметінен кетті

Алматы облысында №1 балалар үйін күштеп көшірмек болғаннан кейін екі лауазымды тұлға қызметінен босатылды. Облыстық білім басқармасының басшысы Салтанат Беспаева мен ішкі саясат басқармасының жетекшісі Ерік Әбитов қызметтерінен өз еріктерімен кетті, деп хабарлайды Orda.kz. 

Бұл оқиға №1 балалар үйінің тәрбиеленушілерін Қонаев қаласына мәжбүрлі түрде көшіру әрекетінен кейін болды. Қоғамда үлкен резонанс тудырған бұл шешімге қарсы балалардың өзі де үн қатты – олар Президент Қасым-Жомарт Тоқаевқа бейнеүндеу жолдап, араша сұрады. Нәтижесінде Президент олардың өтінішіне құлақ асып, көшіру шешімін тоқтатты. 

Ақпарат көздерінің хабарлауынша, Беспаева өз қызметін тұрақты атқарып келген. Алайда ішкі саясат басқармасының басшысы Ерік Әбитов бұл мәселені ақпараттық тұрғыда дұрыс басқара алмаған. Соның салдарынан жағдай Президенттің тікелей бақылауына алынып, аймақтың «аты шығып», дау туды.

Мәлімдемелерге қарағанда, Беспаева мен Әбитов жұмыс барысында өзара келісіп жұмыс істемеген, бірлесе әрекет етпеген. Сондықтан да бұл жауапкершілікті өз мойындарына алған.

Ал Алматы облысының әкімі Марат Сұлтанғазиев қызметінде қалды.