Ажалдан аман қалған Берденов көпшілікке алғысын айтты

Оқ тиіп жараланып, ауруханада жатқан Шымкент әкімінің орынбасары Руслан Берденов желіде жазба жариялады, деп хабарлайды Orda.kz.

Ол Instagram әлеуметтік желісінде жариялаған жазбасында бұл жағдайдың өзі мен отбасы үшін үлкен сынақ болғанын атап өтті. Тілекші жандардың бәріне шексіз алғыс айтып, халықтың жанашырлығын өмірінің ең қиын сәттерінде сезінгенін ерекше атап өтті.

«Сынаққа толы болған осы уақыт аралығында көптеген адамдардың, әріптестерімнің, тамыр-таныстарымның жанашырлығын, қолдауын, тілектестігін сезіндім. Телефоныма түскен қоңыраулар, хабарламалар, әлеуметтік желідегі тілеулес жазбалар көңіліме демеу болғанын, күш-қуат бергенін, сергіткенін айтқым келеді» деп жазды ол.

Берденов сауығуына ең алдымен Алланың қолдауы, кейін дәрігерлердің кәсіби көмегі себеп болғанын айтты. 

«Міне, 3 аптаға созылған ауруханадағы күндерім аяқталып, өзім де аяқтан тұрып, күнделікті тіршілігіме оралатын сәт таяп қалды. Әлбетте, бірінші Алланың, содан соң дәрігерлеріміздің жіті бақылауының, ем-домының арқасында денсаулығым оңалды, қалпына келді. Ақ халатты абзал жандардың мейірімі мен кәсібилігіне көзім жетті. Еліміздің медицинасы шетелдік клиникалардан кем емес» деп жазды ол. 

Еске сала кетейік, Шымкент қаласы әкімінің орынбасары Руслан Берденовке қарулы шабуыл жасалуына байланысты полиция кісі өлтіруге оқталу фактісі бойынша қылмыстық іс қозғаған еді.