Атышулы P. Diddy төрт бап бойынша ақталды

Нью-Йоркте Манхэттендегі федералды сот рэпер және продюсер Шон Комбс (Пи Дидди) ісі бойынша үкім шығарды, деп хабарлайды Orda.kz.

Алқабилер соты оны адам саудасы мен рэкет секілді аса ауыр айыптардан ақтап шықты, бірақ екі айып бойынша кінәлі деп таныды.

Атап айтқанда, Комбс екі рет адам тасымалдау арқылы жезөкшелікке тарту ісіне байланысты жауапты деп танылды. Бұл баптар бойынша әрқайсысы үшін 10 жылға дейін бас бостандығынан айыру жазасы қарастырылған Осылайша, ол өмір бойына түрмеге қамалу жазасынан құтылып кетті.

Сот процесі 2024 жылғы 5 мамырда басталып, шамамен екі айға созылды. Айыптаушылар Комбсты әйелдерді күштеп қатыстыру арқылы ұйымдастырылған «freak-off»(ақ кештерін) өткізіп, оларды сексуалдық мақсатта пайдаланған деп айыптады.

Прокурорлар оның шоу-бизнес саласындағы ықпалын қорқытып-үркіту мен бағындыру үшін пайдаланғанын айтты.

Процестегі басты куәлардың бірі — рэпердің бұрынғы сүйіктісі, әнші Кассандра Вентура. Ол сотта берген түсініктемесінде Пи Диддидің кештеріне қорыққанынан барғанын, оның қаржысы мен мансабын толық бақылауда ұстағанын айтты. Сонымен қатар, сотта аты-жөні жарияланбаған тағы бір әйел куәлік етті. Алайда алқабилер бұл мәлімдемелерді айыптау үшін жеткіліксіз деп есептеді.

Шон Комбс 2024 жылғы 16 қыркүйекте Нью-Йоркте ұсталды. Оған рэкет, адам саудасы, алаяқтық және жезөкшелікке тарту мақсатында адамдарды тасымалдау баптары бойынша айып тағылды. Сотта ол айыптардың ешқайсысын мойындамады.

Қорғаушы тарап Комбсты кепілмен босату туралы өтініш беруге ниетті. Ал прокурорлар екі бап бойынша қатаң жаза қолдануды талап етпек. Соңғы үкімді судья шығарады.