Атырауда NCOC компаниясының менеджерін өлтірген қылмыскер өмір бойына сотталды

Атырау облысының қылмыстық істер бойынша арнайы ауданаралық сотында қоғамда резонанс тудырған іс бойынша процесс аяқталды. Сот NCOC мұнай компаниясының қызметкері 46 жастағы Бибігүл Шпанованы қатыгездікпен өлтірді деп айыпталған Арман Жетпісовке үкім шығарды деп хабарлайды Orda.kz тілшісі.

Жетпісов өмір бойына бас бостандығынан айырылып, жазасын ерекше тәртіптегі мекемеде өтейтін болды.

Қылмыс қалай жасалды?

Сот анықтағандай, 38 жастағы Атырау тұрғыны Арман Жетпісов бұрын сотталған, тұрақты жұмысы болмаған және өзін жөндеу жұмыстарының шебері ретінде таныстырған. Ол бұған дейін «Французский квартал» тұрғын үй кешенінде жұмыс істеген, сол жерде Шпанова тұрған. Әйел оның алдағанын сезіп, ақшасын қайтаруды талап еткен. Сол кезде Жетпісов оның үйіне барған.

Бибігүл есікті ашқанда, Жетпісов алдымен оны ұрып-соғып, кейін 17 рет пышақ сұққан. Пышақ соққысының үшеуі өте ауыр болып,  Бибігүл көз жұмды. Сонымен қатар, ол зорлық әрекеттер жасап, әйелдің жеке заттарын, телефонын, кілттерін және көлігін ұрлаған.

Кейін ол Маңғыстау облысында жол апатына ұшырап, ұсталды. Оның қолынан әйелдің мүлкі табылды.

Сот көптеген дәлелдерді қарастырды. Тергеу хаттамалары, сараптама қорытындылары және бейнебақылау камераларының жазбалары бар. Жазбаларда қылмыс кезінде Шпановаға басқа ешкім кірмегені байқалады.

Қылмыстың сипатына байланысты сот отырыстары жабық түрде өтті. Үкімді судья Зарема Хамидуллина оқыды.

Қаза тапқан әйелдің туыстары сот залында көңіл күйлерін тоқтата алмады. Өмір бойына бас бостандығынан айыру туралы сөз естігенде, олар үкімге қол соғып, көз жасына ерік берді.