Атырауда қомақты қаражат жымқырған шенеуніктер сотталды

Атырауда ветеринарлық бақылау саласындағы сыбайлас жемқорлыққа қатысты іс бойынша инспекция басшысы ұзақ мерзімге бас бостандығынан айырылып, басқа да айыпталушылар қомақты айыппұл арқалады, деп хабарлайды Orda.kz облыстық сотқа сілтеме жасап. 

Атырау қаласының №2 сотында бірнеше сотталушылардың қылмыстық ісі қаралды.

Біреуі бірнеше рет елеулі мөлшерде пара алғаны, алдын ала сөз байласу арқылы адамдар арасында пара алуды ұйымдастырғаны үшін, екеуі алдын ала сөз байласу арқылы адамдардан пара алғаны үшін, қалған екеуі лауазымды тұлғаға айтарлықтай мөлшерде пара бергені үшін айыпталып отыр. 

Инспекция басшысы 7 жыл 6 айға бас бостандығынан айырылды. Бас маман мен ветеринарлық инспекторға пара сомасының 60 еселенген мөлшерінде айыппұл тағайындалды. ЖК және ШҚ басшыларына – пара сомасының 26 еселенген мөлшерінде айыппұл салынды. Барлығы мемлекеттік қызметте және мемлекеттік ұйымдарда қызмет атқару құқығынан өмір бойына айырылды. Сот үкімі заңды күшіне енген жоқ.