Атырауда колледж студентін курстастары дәптерге бола аяусыз соққыға жықты

Атырау облысының Индер ауданында колледж студентін курстастары дәптерге бола қатты соққыға жыққан. Бұл туралы Orda.kz тілшісі хабарлады.

Оқиға 31 желтоқсан күні таңертең оқу орны ғимаратында болған. Зардап шеккен студенттің туыстарының айтуынша, жанжал колледждің дәретханасында шыққан. Жасөспірімді беті мен кеуде тұсынан ұрған. Соққыдан кейін ол шамамен екі сағат бойы колледж ғимаратында болғанымен, оған медициналық көмек көрсетілмеген. Айтуларынша, оқу орнында медбике де, психолог та, куратор да болмаған.

Сондай-ақ, жақындарының мәліметінше, колледж басшылығы жедел жәрдем шақырмаған, оның орнына сынып жетекшісінен түсіндірме жазба талап еткен. Оқиға туралы ақпарат құқық қорғау органдарына тек кейінірек белгілі болған.

Атырау облыстық Полиция департаменті аталған фактіні растады және тергеу басталғанын хабарлады.

«Жасөспірімдер арасындағы жанжал салдарынан орын алған құқық бұзушылық дерегі бойынша кәмелетке толмаған балаға қасақана жеңіл дене жарақатын келтіру бабы бойынша қылмыстық іс қозғалды. Қазіргі уақытта қажетті тергеу амалдары жүргізілуде. Оқиғаға қатысы бар барлық жасөспірімдер полиция бөліміне жеткізілді», — деп мәлімдеді полиция өкілдері. 

Сонымен қатар ведомство өкілдері құқық бұзушылық жасаған кәмелетке толмағандар ішкі істер органдарының есебіне алынғанын, ал іс материалдары кәмелетке толмағандар істері жөніндегі комиссияның қарауына жолданғанын атап өтті.

Редакция колледж әкімшілігі әрекеттеріне қатысты түсініктеме алу үшін Атырау облысының білім басқармасына ресми сұрау жолдады.

Тағы бір айта кетерлігі, бұған дейін медицина қызметкерлеріне жасалған шабуылдар қарапайым бұзақылық ретінде бағаланатын.  Енді қызмет бабында жүрген дәрігер мен жедел жәрдем көлігі жүргізушісінің мәртебесі құтқарушыларға, орман күзетшілеріне, полиция қызметкерлеріне және билік өкілдеріне теңестірілді.

Тақырыпқа қатысты ұсынамыз:

Қауіпті хайп: Астанада колледж студенті зорлық-зомбылық бейнесін таратты

Қызылордада 15 жастағы қызды бірнеше рет зорлаған колледж студенті ұсталды

«Туысым прокурор»: Қарағандыда колледж студентін зорлаған 5 жасөспірім жазадан құтылмақ

«Жатақханада телефон ұрлайтын»: Перизат Қайратқа тағылған тағы бір айып