Атырауда фельдшердің өліміне қатысты іс бойынша 19 адам сот алдында жауап береді

Атырауда жаппай төбелес пен кейінгі атысқа байланысты резонанс тудырған қылмыстық іс бойынша сотқа дейінгі тергеу аяқталды. Бұл оқиға салдарынан 23 жастағы фельдшер қаза тапқан, деп Orda.kz  тілшісі.

Іс бойынша 19 адам күдікке ілінген. Олардың басым бөлігі — 20-25 жас аралығындағы қала тұрғындары. Тергеу деректеріне сәйкес, бұған дейін олар қылмыстық жауапкершілікке тартылмаған.

Оқиға 2025 жылғы 16 тамызда болған. Жанжал «Привокзальный» шағынауданындағы «Ляпиза» мейрамханасында өткен той кезінде басталған. Қонақтар арасындағы сөзге келу төбелеске ұласып, кейін мейрамхана сыртында жалғасқан.

Алғашқы қақтығыстан кейін қатысушылар тарқамаған. Олардың бір бөлігі жанжалды жалғастыруды ұйғарып, таныстарын шақырып, кездесуге келіскен. Соның салдарынан қақтығыс ұйымдасқан сипат алған.

Кейін «Жұмыскер» шағынауданынан шамамен 16 адамнан тұратын топ Химпосёлок ауданындағы кездесуге келген. Олардың жанында атыс қаруы, соның ішінде аңшылық мылтықтар мен тапаншалар болған. Тергеу нұсқасы бойынша, қарудың бір бөлігі қолдан өзгертілген.

Оқиға орнында атыс болған. Соның барысында оқтың бірі 2001 жылы туған, фельдшер болып жұмыс істеген Азамат Асылбековке тиген. Ол алған оқ жарақатынан оқиға орнында көз жұмды.

Оқиғадан кейін қатысушылар оқиға ол жерден кетіп, қаруларды жасырып, қылмыстың ізін жасыруға әрекет жасаған. Күдіктілердің бірі қылмысты жасыру дерегі бойынша бөлек айыпталып отыр.

Айыпталушыларға адам өлтіру, бұзақылық, қаруды заңсыз сақтау және қолдану, сондай-ақ қылмысқа қатысу баптары бойынша айып тағылған.

Қазіргі уақытта күдіктілердің бір бөлігі қамауда отыр, қалғандары үйқамақта немесе ешқайда кетпеу туралы қолхатпен босатылған.

Қылмыстық іс мамандандырылған ауданаралық қылмыстық істер сотына жолданды.