Атырау облысындағы белгісіз нысанның құлау фактісін ведомствоаралық комиссия зерттейді

Атырау облысының Ресей шекарасына жақын маңда қозғалтқыштары бар белгісіз нысанның құлауына байланысты тергеу жұмыстары жалғасып жатыр, деп хабарлайды Orda.kz.

Қоныртерек ауылы тұрғындарының айтуынша, нысан далаға құлап, арты күйіп кеткен шеңбер тәрізді із қалдырған. Куәгерлер алғашында түтін көргендерін, кейіннен техникалық құрылғы бөлшектеріне ұқсайтын металл сынықтарын байқағандарын айтты.

«Сол күні ауылға полиция қызметкерлері, ТЖД мамандары және әкімдік өкілдері келді. Ешкім зардап шеккен жоқ, бірақ, әрине, қатты қорықтық. Біздің аймақта Азғыр полигоны бар ғой, көпшілік бұл зат ауылдың маңына емес, сол жаққа құлауы тиіс еді деп ойлады» , — деді ауыл тұрғындарының бірі. 

Қазіргі уақытта кешенді тексеріс жүргізіліп жатыр. Мамандар құлаған нысанның бөлшектерін зерттеп, оның шығу тегін анықтауға тырысуда.

Атырау облысының әкімі Серік Шәпкенов оқиға орнында ведомствоаралық комиссия жұмысын жалғастырып жатқанын растады.

Қазақстан фермерлер ақбөкендерді апатқа себепкер деп санайды: Экология министрлігі олардың саны реттелетінін мәлімдеді.