Атырау облысында бетін бүркеген төрт адам ҰҚК қызметкерлеріне шабуыл жасады

Атырау облысында шекара қауіпсіздігін қамтамасыз ету үшін кешенді шаралар күшейтілді. 28 қыркүйекте бетін бүркеген төрт адам Атырау облысы жағалау күзетінің катеріне шабуыл жасады, деп хабарлайды Orda.kz.

28 қыркүйек күні сағат 14:00-де департаменттің жағалау күзеті дивизионының шекара катері қызметтік тапсырманы орындау барысында ірі көлемдегі браконьерлік ау құралдарын анықтады. Қамыс арасынан кенеттен бетперде киген төрт белгісіз адам отырған «Байда» типтес қайық үлкен жылдамдықпен шықты. Олар тоқтау туралы заңды талапқа бағынбай, қауіпті бұрылыстар жасап, катердің сол қапталына соғылды. Соның салдарынан экипаж мүшелерінің бірі суға құлап кетті.

Құқық бұзушылар оқиға орнынан белгісіз бағытқа қашып кетті. Қазіргі уақытта Атырау облысының шекара қызметі департаменті құқық қорғау органдарымен бірлесіп іздестіру шараларын жүргізіп жатыр.

Айта кетейік, Алматы облысында кәсіпкердің үйін тонаған ұрылар қолға түсті. Қылмыс 12 қыркүйекте болған. Күдіктілер бетперде тағып, үйге кірген.