Атырау әкімдігінде өзін-өзі өртемек болған азамат бұзақы деп танылды

Шарасыз әрекетке жер мәселесінің шешілмеуі себеп болған. Атырау тұрғыны Нұрлан Отарбаев әкімдікке канистрмен келіп, өзіне бензин құйған.

Бағына орай, ер адам өзін-өзі өртеп үлгермей, оны әкімдік қызметкерлері тоқтатты, деп хабарлайды «Ақ Жайық» басылымы.

«Полиция шақырылды, қала әкімі Шәкір Содан да жүгіріп келді. Менің мәселем шешілетінін, өзімді өртеудің қажеті жоқ деді. Олар бізге сабырмен үйге барып, жуынып, сағат 16:00-де әкімдікке келуді ұсынды. Мен осылай істедім»,   деп еске алады Нұрлан Отарбаев.

Айтуынша, ол өзіне белгіленген уақытта қайта келген, кейбір тәртіп сақшылары оған жер учаскесі беріледі деп тағы да уәде берген. Сосын түсіндірме хат жазу үшін бөлімге баруын сұраған. Онда ол уақытша ұстау изоляторына қамалды.

«Олар маған хаттама берді және мен оған қол қойғаннан кейін бірден кетіп қалуға деп сендірді. Қол қойған кезде олар менің ұсталғанымды ресми түрде жариялап, уақытша ұстау изоляторына қамады. Келесі күні таңертең мені бұзақылық жасады деп айыптап, 51 мың теңге айыппұл салды»,

– дейді ер адам. 

Полицейлердің басылымға хабарлауынша, бұл оқиға 1 ақпан күні сағат 11:45-те болған.

«Атырау қаласының әкімдігіне азамат Н.Отарбаев келіп, өзіне бензин шашып, өзін өртеп жіберемін деп қорқытқан. Осылайша ол жер мәселесінің шешілмей жатқанына наразылық білдірді. Осы себептермен азамат  әкімшілік жауапкершілікке тартылды. Қазақстан Республикасының Әкімшілік құқық бұзушылық туралы кодексінің 434 бабы 1 бөлігімен оған «Ұсақ бұзақылық» бойынша қылмыстық іс қозғалды»,  делінген БАҚ өкілдерінің сауалына берілген жауапта.