«Аттың жалына байлап сүйреген»: Жетiсуда әкімдікке үміткер болған ер адам әйелін азаптап өлтірді

Жетісу облысында 32 жастағы Айзат Жұманованы күйеуі жантүршігерлік жағдайда азаптап өлтірді. Қайғылы оқиға 22 маусымда Ақсу ауданы Баласаз ауылында болған, деп хабарлайды Orda.kz. 

32 жастағы марқұмның туыстары қаралы қазаға күйеубаласы Жанболат Айбарды кінәлап отыр. Туыстары әйелді күйеуі арқанмен аттың жалына байлап, сүйреген деген болжам айтып отыр. Ер адам әйелін бірнеше сағат бойы ұрып-соққан. Кейін ауруханаға өзі алып барған. Айзат Жұманова түнгі сағат 2:30 шамасында ауыр халде Талдықорғандағы облыстық ауруханаға жеткізілген. Бірақ келіншек оған дейін көз жұмған екен. Әйелге дәрігерлер ми жарақаты, ісіну, жамбас сүйектері, аяқ-қолы, бас сүйегі сынды деген диагноз қойған. Ер адам ауруханадағыларға әйелін «2-ші қабаттан құлап кетті» деп айтқан. 

Қазіргі таңда полиция қылмыстық іс қозғады. Айта кетейік, желіде ер адамның Ақсу ауданы Арасан ауылдық округі әкімі сайлауына үміткер болғаны туралы ақпарат тарады. 

Еске салайық, 15 шілде күні Қостанай облысында ер адам әйелі мен енесін өлтіріп кеткен еді.