Арнайы операция аясында 37 тонна есірткі тәркіленді

2023 жылы Қазақстанда «Қарасора» операциясы кезінде  рекордтық мөлшердегі – 37 тоннаға жуық есірткі тәркіленді.

Бұл туралы ішкі істер министрі Ержан Сәденов мәлімдеді.

«Жыл сайын осы шара аясында («Қарасора» операциясы) 15-20 тонна есірткі тәркіленеді. Биыл бұл көрсеткіш соңғы 6 жылдағы ең жоғары көрсеткішке жетті – шамамен 37 тонна»,-  деді Сәденов.

Оның айтуынша, елдегі есірткі жағдайына өзіміздің қарасора шикізат базасының болуы әсер етеді.

«Оқиға Шу алқабында ғана емес, сонымен қатар еліміздің орталық және оңтүстік өңірлерінде кендір өсімдігін  ұйымдасқан түрде өсіру туралы болып отыр»,- деп қосты Сәденов.

Онымен күресу үшін «Қарасора» операциясы жыл сайын маусымнан қазанға дейін жүргізіледі. Оның айтуынша, есірткі дақылдарын іздеуде тікұшақтар, жол талғамайтын көліктер, ұшқышсыз ұшатын аппараттар белсенді түрде пайдаланылуда. Былтырдан бері жер беті ғарыштан зерттелді.