Антикор назары ғылым саласына түсті

Сыбайлас жемқорлыққа қарсы іс-қимыл агенттігі ғылымды қаржыландыру саласындағы жемқорлық тәуекелдеріне сыртқы талдау жүргізді. 

Бұл туралы сыбайлас жемқорлыққа қарсы іс-қимыл агенттігі хабарлайды.

Жүргізілген талдау нәтижесінде ғылыми жобаларды іріктеудің ашықтығына, оларды іске асырудағы көзбояушылық пен нәтижелер үшін жауапкершіліктің болмағанына көз жеткізді. Сондай-ақ, зерттеу қорытындыларының төмен сұранысына, ғылыми тағылымдамалар үшін грант беру жөніндегі конкурстық комиссия құрамына қойылатын талаптардың төмендігіне байланысты жемқорлық тәуекелдерін анықтады.
 
Атап айтар болсақ, 11,5 млрд теңгеге 30 зерттеу анықталды, олар бойынша сараптама белгілі бір тұлғалардың мүддесі үшін ғана жүргізілгені белгілі болды.
 
Ғылыми жобаларды коммерцияландыру  деген желеумен бюджет қаржысына қол сұққан. 2016 жылдан бері мемлекет бұған 32 млрд теңге жұмсаса, 145 жобаның 130-ы өз мақсатына жете алмаған.

Ақпараттық және есептеуіш технологиялар институты биогаз және биотыңайтқыштар өндіретін құрал-жабдықтар әзірлеуге 290 млн сұраған. Бұл ретте дайын аналогтары нарықта он есе арзан болып шықты. Сонымен қатар, ғылыми әзірлемелерді желеу етіп, жұмыс істеп тұрған кәсіпорындарды кеңейтуге деп қаржыландыру алған.
 
Ресми мәліметтерге сәйкес, 2019 жылы еліміздегі ірі құс фабрикаларының бірі қазақ дәмді тағамдар технологиясы мен рецептурасын әзірлеуге 300 миллион теңгеге жуық қаражат алған. Дегенмен, іс жүзінде барлық қаражат құрал-жабдықтар мен материалдар сатып алуға жұмсалды.
 

«Жүргізілген талдау нәтижелері бойынша Ғылым және жоғары білім министрлігіне 100-ден астам ұсыныс енгізілді. Атап айтар болсақ, жұмысты ұйымдастыру ережелері мен сараптау комиссиясы және оның мүшелеріне қойылатын біліктілік талаптарын күшейтті.  Енді қызметкердің жалпы жұмыс өтілі 10 жыл, ал мамандығы бойынша кемінде 5 жыл болуы керек, бұрын 3 жыл болған» деп хабарлады Антикор.