«Анасын боқтады»: Ақнәрдің құрбысы оқиға болған күнді баяндап берді

«7-қабаттан денесін лақтырып жіберді» деп танылған Ақнәр Гүлістанның жұмбақ өлімі бүкіл халыққа мәлім. Оқиғаға кінәлі деп танылған 2 құрбысының бірі Дидар Мұқият журналист Руслан Өтепбайға сұхбат берді, деп хабарлайды Orda.kz.

Сұхбат барысында Дидар оқиғаның қалай болғанын өз нұсқасы бойынша айтып берді.

«2024 жылдың шілде айының 18-не Ақнәр өз маған хабарласып: «Раноның анасы қайтыс болды, көңіл айтып, шәй берейік» деді. Содан сол күні ресторанға барып, көңіл айтып, шәй бердік. Екінші күні Ақнәр өзі бізге хабарласып, қыздар болып өзіміз отырайық деп ұсыныс тастады. Ақнәр сол күні ішімдік  ішкісі келді», – деді Дидар Мұқият.

Оның айтуынша, Ақнәр Дидарға хабарласып, ішімдікке тапсырыс бергізген. Кейін Рано мен Дидар келген соң, қыздар әңгімелесіп 4 сағат бойы тамақтанған. Ал ас басында ішімдік әлі ішілмеген.

Дидар Ақнәрдің ішкенін өз көзімен көргенін мәлімдеді. Дидар өзінің сараптама нәтижесінде алкоголь тұтынғаны расталғанын айтты.

– Сіздер егер Ақнәрмен бірге қатар ішсеңіздер, сіздердің қан құрамдарыңызда спирт бар болса, неге Ақнәрде спирт жоқ?

– Түсінбедім. Мүмкін бізден аз ішкен шығар.

– Сіз өзіңіз 2 бөтелке ішті деп айтып отырсыз ғой.

– 3-еуіміз бір-бір бөтелкеден іштік, кейін 4-шісін бөліп іштік.

– Сарапшылар да экспертизаны жалған берсе, ол кісілер де жауапқа тартылады. Олар құжатпен танысқаны туралы қол қойған. Бұл қалай болғаны? Не сіз өтірік айтып отырсыз, не сарапшылар жалған сөйлеп отыр.

– Жоқ, нақты үшеуіміз іштік. Жалған емес.

Дидардың айтуынша, Ақнәр өзін-өзі ұрып, айғайлаған.  Ақнәр оларға да жұдырық ала жүгірген. Кейін Ақнәр Раноның марқұм анасын боқтаған, содан соң намаз оқыған.  Дидар Ақнәр туралы кең тараған бейнероликке түсініктеме берді. Әлеуметтік желіде Ақнәр туралы алғаш таралған бейнероликте бір көргенде құрбылары Ақнәрға жабылып, жәбір көрсетіп жатқандай көрінеді, ал Дидардың сөзінше, Ақнәр өзін өзі ұрғылап жатқан соң оның қолынан тас қылып ұстап алған және оны сабыр сақтауын өтінген.

Еске сала кетейік, 23 мамыр күні Ақнәрдің 2 құрбысының бірі Дидар Мұқияттың адвокаты Жандос Палманов БАҚ өкілдеріне арнайы баспасөз мәслихатын өткізген болатын. Адвокат журналистерге тың ақпарат беріп, бейнероликтерді көрсетті. Ол Ақнәр терезеден секіргенде Дидардың әжетханада болғанын мәлімдеді.