Ана мен баланы қолдауға мемлекет 756 млрд қаражат бөлді

2021 жылы ана мен баланы қолдауға бюджеттен 756 млрд теңге бөлінді. 2020 жылы 100 млрд-қа аз бөлінген, яғни, 635,3 млрд теңге. 1 жыл ішінде қолдауға бөлінген қаражат мөлшері 19 пайызға артқан.

Бұл туралы Orda.kz хабарлады.

Қазақстан ана мен баланы қалай қолдап жатқаны туралы Еңбек және халықты әлеуметтік қорғау министрлігінің Әлеуметтік көмек саясатын дамыту департаментінің директоры Асқар Ниязов баяндап берді.

Жалпы әлеуметтік қолдау шаралары бюджеттен төленетін жәрдемақылардың 5 және мемлекеттік әлеуметтік сақтандыру қорының 2 төлем түрі бар.

Әр балаға 110 846 теңгеден 183 771 теңгеге дейінгі аралықта біржолғы жәрдемақы беріледі.

2020 жылы 430,7 мың анаға 52,3 млрд теңге төленген, ал биыл 6 айда 24,6 млрд теңге берілген. Әлі 51 млрд теңге төленеді.

– Жұмыс істемейтін әйелдер үшін бала бір жасқа толғанға дейін оның күтімі бойынша ай сайынғы жәрдемақы төлеу қарастырылған. Жәрдемақының бұл түрі екінші, үшінші және одан кейінгі балаларға – 16 802 теңгеден 25 962 теңгеге дейін арттырыла отырып, баланың туу кезектілігіне байланысты төленеді. 2020 жылы бұл жәрдемақыны 120,9 мың адам жалпы сомасы 31,7 млрд теңгеге алды. 2021 жылға 26,2 млрд теңге қарастырылған, оның 6,8 млрд теңгесі төленді, - деді Ниязов.

Көпбалалы отбасыларға қандай қолдау көрсетіледі?

4 және одан да көп бірге тұратын кәмелетке толмаған балалары немесе 23 жасқа дейінгі күндізгі бөлімде оқитын студент балалары бар көпбалалы отбасыларға табысына қарамастан жәрдемақы беріледі. 4 балаға 46 760 теңгеден, 16 балаға 186 688 теңгеге дейінгі аралықта жәрдемақы беріледі.

2021 жылдың бірінші жартыжылдығында 458,9 мың отбасы 141 млрд теңге алып үлгерген.

«Алтын алқа» мен «Күміс алқа» иелері неге дәмелене алады?

230,3 мың адамнан тұратын «Алтын алқа», «Күміс алқа» иегерлеріне 18 669 теңге көлемінде жәрдемақы төленеді. Жыл басынан бері 25,8 млрд теңге төленді. 

– Сонымен қатар, мемлекеттік бюджеттен мүгедек бала кәмелеттік жасқа толғанға дейін оның күтіміне байланысты жәрдемақы төленеді. Жәрдемақы мөлшері 48 023 теңге. Бүгінде ол 92 мың отбасына 27,2 млрд теңге сомасында төленді. Мүгедектігі бар бала кәмелеттік жасқа толғаннан кейін олардың қатарынан аса мұқтаж адамдарға бала кезінен бірінші топтағы мүгедектігі бар азаматтың күтіміне байланысты жәрдемақы төленеді. Оның мөлшері 48 023 теңге болды. Бұл жәрдемақыны бүгінде 15 мыңнан астам отбасы 4,4 млрд теңге сомасына алды. Аталған төлем түрлері баланың мүгедектігі бойынша жәрдемақыдан басқа жүзеге асырылатынын атап өткім келеді, - деді Асқар Ниязов.

2020 жылы бала туу коэффициенті 3,13 болған, ал демографиялық өсімге 2,1 коэффицент жеткілікті.