Алты компанияның салығын жеген Шымкент тұрғыны үш жылға сотталды

Жалған шот-фактуралар жазып, мемлекетке 400 миллион теңгеден астам шығын келтірген шымкент тұрғынына сот үкім шығарды.

ҚМА баспасөз қызметінің хабарлауынша, Шымкент қаласының тұрғыны алты компанияны тіркеген, бірақ олармен нақты жұмыс орындамай, қызмет көрсетпей жалған шот-фактуралар жазып берген. Осылайша ол мемлекеттен жалпы сомасы 443 миллион теңге болатын салықты жасырып үлгерген.

Соңында ер адамның қылмыстық әрекеттері әшкере болды. Оған қатысты тергеуді ҚМА облыстық департаменті жүргізді. Іс сотқа өтіп, шымкенттік үш жылға бас бостандығынан айырылды. Сондай-ақ сотталғанның мүлкі – 15 миллион теңгеден астам заңсыз табыс пен 50 миллион теңгеден астам жылжымайтын мүлік мемлекет меншігіне өткен.

2023 жылдың соңында Алматыда екінші деңгейлі банк шоттарынан ақшаны заңсыз иемденіп, коммерциялық ұйымдарға салық төлеуден жалтаруға көмектескен қылмыстық топ әшкереленді. Ұйымдасқан қылмыстық топ мүшелері 5 миллиард теңгеден астам сомаға жалған шот-фактуралар жазып үлгерген.