Алматыдағы психиатриялық ауруханадағы қылмыстық топ: Прокурор айыпталушыларға жаза сұрады

Алматыдағы психиатриялық ауруханамен байланысты ұйымдасқан қылмыстық топ ісі бойынша айыпталушыларға ұзақ мерзімге бас бостандығынан айыру жазасы сұралды, деп хабарлайды Orda.kz.

Алматыдағы мамандандырылған ауданаралық қылмыстық сотында жарты жылға жуық уақытқа созылған атышулы іс аяқталуға жақын. Тергеу барысында 37 эпизод қаралып, қылмыстар психикалық денсаулығы нашар адамдарды заңсыз ұрлау, кісі өлтіру, жылжымайтын мүлікті иемдену мақсатындағы алаяқтық және психикалық науқастарға зорлық-зомбылық жасау істерімен байланысты екені анықталды. 

Қылмыстық схемаға психиатриялық мекемелердің басшылары, заңсыз нотариустар, учаскелік инспекторлар, риелторлар мен сот-медициналық сарапшылар қатысқан. Олар әлеуметтік қызметкерлер мен дәрігерлерден психикалық ауруы бар, жалғыз тұратын адамдар туралы ақпарат жинап, олардың жылжымайтын мүліктерін қолдан жасалған құжаттар арқылы басқалардың атына рәсімдеп, арзан бағамен саудалап отырған.

Бүгін, 27 ақпанда, соттағы пікірталас кезінде мемлекеттік айыптаушы Нұрасхан Мырзалы қылмыстық топ жетекшілері мен ұйымдастырушыларына ауыр жаза тағайындауды сұрады.

• Ирина Гапарова – 20 жыл қатаң режимдегі колонияда;
• Аширалы Болтабоев – 18 жыл бас бостандығынан айыру;
• Әуелхан Сатаев – 20 жыл түрмеде өткізуі тиіс.

Басқа сотталушыларға да төрт жылдан бастап ұзақ мерзімге дейінгі жаза сұралды.

Психикалық денсаулық орталығының бұрынғы басшыларына қатысты прокурорлар келесі жазаларды талап етті.

• Айжан Жүсіпғалиева (бірінші бөлім) – 13 жыл;
• Майра Оразаева (үшінші бөлім) – 8 жыл;
• Ғазиза Ешмұратова (Талғардағы оңалту орталығы) – 4 жыл.

Процесс барысында барлық куәгерлер, оның ішінде тергеушілер мен жасырын куә тыңдалды. Тергеу нәтижесінде екі кісі өлтіру және және мемлекеттік құжаттарды қолдан жасау фактілері анықталып, бұл эпизодтар жеке тергеліп жатқаны белгілі болды. Мемлекеттік архивтің кейбір қызметкерлері де күдікке ілінді.