Алматыда ондаған үй суық сусыз қалды

Алматыда суық су желілерінде апат болып, салдарынан 40 үй суық сусыз қалды, деп хабарлайды Orda.kz.

Бұл туралы Orda.kz редакциясына портал оқырманы хабарлады. Оның айтуынша, «Шұғыла» шағын ауданында 48 сағаттан астам суық су жоқ.

«Алматы су» кәсіпорнының баспасөз қызметі редакцияға хабарлағандай, «Шұғыла» шағын ауданында Алатау даңғылы мен Сәбденов көшелерінде апат болып,  40 үй суық сусыз қалды.

Апатты қалпына келтіру жұмыстарына екі жедел-құтқару жасағы мен үш арнайы техника жұмылдырылған.

«Төтенше жағдаймен күрес  20 қаңтар күні сағат 10:00-ден бері жүргізілуде. Апатты жағдайды  21 қаңтар күні сағат 14:00-ге дейін толық қалпына келтіру жоспарлануда» деді баспасөз қызметі.

Сондай-ақ компания апат орнын толтырғанша Шұғыла 341/1, 2, 3, 4, 5 ықшамауданында тұратын тұтынушыларға автоцистерналармен су жеткізіп жатқанын хабарлады.