Алматыда Дженнифер Лопесті 3 мыңға жуық адам қорғайды

10 тамызда Алматыда өтетін Дженнифер Лопестің концерті кезінде қауіпсіздікті қамтамасыз етуге 3 мыңға жуық адам қатысады, деп хабарлайды Орда.kz. 

Алматы қаласы әкімдігінің мәліметінше, іс-шараның қауіпсіздігін 2960 адам бақылайды. Концерт өтетін Орталық стадион аумағы төрт фан-аймаққа бөлінеді. Әр фан-аймаққа 2–3 мың адам сыяды екен.

«Қоғамдық тәртіпті сақтау үшін 2960 адам тартылады. 2240 полиция қызметкері, 600 әскери қызметкер, 120 жеке күзет агенттіктерінің қызметкері және 300 ерікті. Сондай-ақ 26 бақылау-өткізу бекетіне металл іздегіштер мен 52 қол сканері орнатылады», – деді әкімдік.

Сонымен қатар, 9 тамызға дейін стадионда жөндеу және құрылыс жұмыстары толық аяқталмақ. Қазірдің өзінде жарық жүйесі жаңартылып, 50-ден астам прожектор ауыстырылды, дезинфекция жүргізілді, қоршаулар қалпына келтірілді. Қазіргі уақытта трибуналар мен орындықтар ішінара ауыстырылып жатыр. Стадион маңына шамамен 100-ге жуық қосымша биодәретхана орнатылады.

«Бұл концерт Алматы үшін маңызды оқиға. Оның қалай өтетіні қаланың халықаралық имиджіне әсер етеді, сондықтан барлық ұсақ-түйек ескерілгені дұрыс. Мұндай іс-шаралар қалаға назар аудартқызып, туризмнің дамуы үшін өте маңызды», — деді қала әкімінің орынбасары Азамат Қалдыбеков.

Сондай-ақ, әкімдік қызметкерлерінің айтуынша, стадион маңында өрт сөндірушілер мен жедел жәрдем қызметі кезекшілік етеді. Барлық шұғыл қызметтер толық дайындық режиміне ауыстырылды. Концертке келушілерге ыңғайлы болу үшін арнайы автобус қозғалысы бар.