Алматыда автобус жүргізушісі рөлде отырып қайтыс болды

Қалалық автобустың жүргізушісі рейс кезінде қайтыс болды. Оқиға 25 қаңтар күні Абай даңғылы мен Сайын көшесінің қиылысында болғанын  Orda.kz хабарлайды.

«Алматыэлектротранс» ЖШС мәліметінше,  қала ішіндегі №92 бағытта жүрген автобусты тізгіндеп келе жатқан 1971 жылы туған жүргізушінің жағдайы шамамен сағат 14:35-те, бағдаршамның жүруге тыйым салатын «қызыл» дабылына тоқтаған сәтте кенеттен нашарлаған. 

Жолаушылардың бірі жедел әрекет етіп, жүргізуші кабинасына кіріп, тежегіш педалін басқан. Соның арқасында ықтимал жол-көлік оқиғасының алдын алуға мүмкіндік туды. Жолаушылар бірден жедел жәрдем шақырған.

Оқиға орнына келген медицина қызметкерлері жүргізушінің қайтыс болғанын растады. Алдын ала болжам бойынша, өлімнің себебі — жедел миокард инфаркті. Жолаушылар арасында зардап шеккендер жоқ, автобусқа техникалық зақым келмеген.

«Алматыэлектротранс» өкілдерінің хабарлауынша, жүргізуші рейске шығар алдында міндетті медициналық тексеруден таңғы 06:10-да өткен, ал автобус 06:24-те техникалық бақылаудан өткен. Бұл күн оның 2/2 кестесі бойынша алғашқы жұмыс күні болған.

Ер адам компанияда 2023 жылдың тамыз айынан бері жұмыс істеген, диспансерлік есепте тұрмаған.

Еске салсақ, былтыр қала әкімдігі әрқайсысы 300 автобусқа арналған екі жаңа автопарк құрылысына арналған алаңдар мен инвесторларды нақтылады. Бір парк  Құлжа тас жолы аумағында, екіншісі - Мөңке би көшесінің солтүстігінде болады. Екі кешенде де жеке газ толтыру станциялары орнатылады.

Оқи отырыңыз:

• Ақтауда «полицей болып» ойнап, көлік тексергендердің ісі сотқа берілді
• Шымкенттегі жолға таласып, кісі өлтіргендерге қатысты тағы үш күдікті ұсталды
• Прокурорлар мен тергеушілер адвокаттық лицензия алу үшін аттестациядан өтеді