Алматы облысында жасөспірім ойнап жүріп мұз астына түсіп, қаза тапты

Алматы облысының Жамбыл ауданында Үмбетәлі ауылында мұз үстінде ойнап жүрген жасөспірім мұз жарылып,  суға батып кетті. Оқиға орнына ТЖМ және РЖҚЖ құтқарушылары келді, деп хабарлайды Orda.kz.

Төрт бала ойын кезінде жұқа мұздың үстіне шығып, суға түсіп кеткен.

Жақын жерде жүріп көріп қалған балықшы бірден көмекке жүгіріп, үшеуін құтқарып қалды. Төртінші баланы құтқару мүмкін болмады. Оның денесін сүңгуірлер судан шығарып, полиция қызметкерлеріне берген.

ТЖМ кезекті рет су қоймаларында қауіпсіздік шараларын сақтау қажеттігін еске салып, балаларды қараусыз қалдырмауға, сондай-ақ жұқа мұзға шықпауға шақырды.

Еске салсақ, бір отбасының төрт бірдей адамы бірде-бір нақты бағытсыз ізім-ғайып жоқ болған.  Атырау облысының полициясы Жангелдин ауылынан 2025 жылдың күзінде құпия түрде жоғалып кеткен отбасын іздестіріп жатыр.