Алматы әкімінің жаңа орынбасары тағайындалды

Алматы қаласының әкімі Дархан Сатыбалдының өкімімен және президент әкімшілігінің келісімімен Абзал Нүкенов Алматы қаласы әкімінің орынбасары қызметіне тағайындалды, деп хабарлайды Orda.kz.

Жаңа орынбасар ішкі саясат, мәдениет, спорт, білім, жастар саясаты және дін істері салаларына жетекшілік етеді.

Абзал Нүкенов 1978 жылдың 21 шілдесінде Жетісу облысында дүниеге келген. Әл-Фараби атындағы Қазақ ұлттық университетінің түлегі, саяси ғылымдар кандидаты.

«Еңбек жолын 2000 жылы бастаған. Бұған дейін Алматы қаласы Ішкі саясат департаментінде және Әуезов ауданы әкімінің орынбасары қызметтерін атқарған. Әр жылдары Қауіпсіздік кеңесінің Ситуациялық орталығын басқарған, Дін істері және азаматтық қоғам вице-министрі, Қарағанды облысы әкімінің орынбасары болған. Сондай-ақ, Президент Әкімшілігінде басшылық қызметтер атқарған» деп жазды баспасөз қызметі.

Тағайындалғанға дейін ол ҚР Президенті Әкімшілігінің Ішкі саясат бөлімінің меңгерушісі қызметін атқарған.