Алған несиені 5 есе артығымен төлеткен микроқаржы ұйымдарына іс қозғалды

Қаржылық мониторинг агенттігі (ҚМА) микроқаржы ұйымдары (МҚҰ) арқылы жасалған алаяқтық схеманы анықтады, деп хабарлайды Orda.kz.

 Адамдар алған несиелерін 5 есе артық төлеп, жалпы залал 30 миллиард теңгеге жеткен. Алматыда бірден алты МҚҰ-ның заңсыз әрекеті әшкереленді:

• Creditum
• Sofi Finance
• Hava Finance
• SF Offline
• POS Credit
• Сәлем Кредит

Бұл ұйымдар қарызын өтей алмаған адамдарға KOKE.KZ, TENGO.KZ, HAVA.KZ секілді платформалар арқылы аффилиирленген кеңселермен «кепілдік келісімшарттарын» мәжбүрлі түрде жасатқан. Бірақ бұл «кепілдіктер» тек қарыз алушы қайтыс болған жағдайда ғана іске асатын. Соған қарамастан, олар несие қарызынан 3–5 есе көп комиссия ұстап отырған.

Мысалы, бір ер адам 120 000 теңге несие алған, бірақ 446 000 теңге кепілдік төлемін жасаған. Бұл  негізгі қарыз бен пайыздарды қоспағанда!

МҚҰ-лардың негізгі табысы несие пайызынан емес, дәл осы жалған кепілдіктерден түскен. Қазір аталған ұйымдарға қатысты қылмыстық істер қозғалып, тергеу жүріп жатыр.