Әлемге танымал эколог Олжас Дүйсен қамауға алынды

Алматыда кәсіпкер, эколог, инновациялық патенттердің авторы Олжас Дүйсен қамауға алынды. Бұған дейін ол әлеуметтік желіде өзіне заңсыз қысым көрсетіліп жатқанын мәлімдеген болатын, деп хабарлайды Orda.kz.

Ол өзінің әлеуметтік желісінде тергеу изоляторына алып бара жатқандарын айтты.

«Тағылып отырған негізсіз айыптауларға қатысты кінәсіз екенімізді толық дәлелдейтін айғақтарды ұсындық. Алайда прокуратура органдары бұл дәлелдерді қабылдаудан бас тартып отыр. Бұл – заңсыздық, бұл – бассыздық, ол мемлекеттің тұрақтылығына нұқсан келтіреді. (…) Егер бұл жағдай жалғаса берсе, ертең кез келгеніміз осындай жағдайға тап болуымыз мүмкін. Қазір мені алып кетуге келді, сыртта жедел қызметкерлер тұр, қазір мені тергеу изоляторына алып кетеді», — деді Олжас Дүйсен.

Оның айтуынша, ол KazEcoSolutions серіктестігінің бұрынғы серіктесінің арызы негізінде қылмыстық іске тартылғалы отыр. Оның әлеуметтік желідегі жариялаған сөздеріне қарасақ, алғашында оған өз компаниясынан қаржы жымқырды деген айып тағылса, кейін бұл айыптауларды жоққа шығаратын құжаттар ұсынылған соң, прокуратура оған рейдерлік жасады деген жаңа іс қозғаған.

Олжас Дүйсен құқық қорғау органдары белгілі бір тұлғалардың тапсырысын орындап отырғанын айтады. Сондай-ақ, бұл алғашқы қысым емес екенін атап өтті. 2024 жылдың қарашасында Бакудегі климаттық митингке қатысып жүрген кезінде-ақ өзіне қарсы репрессия жасалуы мүмкін деп қауіптенген.

Кәсіпкердің айтуынша, бұл жағдай 2008 жылы басталған. Сол жылы ол серіктестерімен бірге KazEcoSolutions компаниясын құрып, топырақты тазарту мен қалдықтарды өңдеумен айналыса бастаған. Кейін бірнеше мәміле нәтижесінде ол компанияның жалғыз иесі атанған. Алайда оның бұрынғы серіктесі Ержанов бұл келісімдерді заңсыз деп танымақ болған. Олжас Дүйсеннің айтуынша, тәуелсіз аудит кезінде Ержановтың өзі 23 миллион теңге көлемінде қаржы жымқырғаны анықталған.

Дүйсен өзіне тағылған айыптарды ойдан құрастырылған деп есептейді және бұл істің әділ қаралуын талап етеді. Ол жұртшылықтан бұл жағдайға назар аударуды сұрап, Қазақстан Президентінен заңдылық пен әділеттілікті қамтамасыз етуді өтінген еді.