Алакөлде әйел адамды катер қағып қаза тапты

Алакөл көлінде катер жүргізген ер адам 63 жастағы әйелді қағып кетіп, ол алған жарақаттарынан көз жұмды, деп хабарлайды Orda.kz.

Қайғылы оқиға жағалаудан 200–250 метр қашықтықта болған. Әйел суға шомылып жүрген кезде, катер оны тура үстінен басып өткен.

Абай облысының полиция департаменті хабарлағандай, өзен көліктерінің қозғалыс қауіпсіздігі ережелерін бұзу салдарынан адам өліміне әкелген жағдай бойынша қылмыстық іс қозғалды.

«Катер жүргізушісі уақытша ұстау изоляторына қамалды, іске байланысты сараптамалар тағайындалды. Оқиға орнында уәкілетті органдар тексеру жұмыстарын жүргізіп жатыр. Тергеу жалғасуда. Оның нәтижесі бойынша заңнамаға сәйкес процессуалдық шешім қабылданады», деп мәлімдеді облыстық полиция департаменті. 

Қазақстанның Туризм және спорт министрлігі марқұмның туыстары мен жақындарына көңіл айтты.

Сонымен қатар, ведомство су көлігі саласын реттеу мәселелері – оның ішінде лицензия беру, басқаруға рұқсат ету, техникалық тексеріс пен шағын көлемді кемелерді тіркеу – олардың құзыретіне кірмейтінін атап өтті.

Министрлік бұл мәселеге байланысты ресми хаттарды Көлік министрлігіне, Ішкі істер министрлігіне және жергілікті атқарушы органдарға жолдап, су жағасында демалатын орындарда қауіпсіздікті күшейтуді және осындай қайғылы жағдайлардың алдын алу үшін барлық қажетті шараларды қабылдауды ұсынды.

Бұған дейін Алакөлдегі ретсіздік туралы бірнеше рет жазылған болатын. Белгілі заңгер Саида Тәуекелова бұл жағдайға қатысты өткір сын айтып, Facebook парақшасында балалар мен ересектер суға шомылып жүргенде, олардың жанында катер мен су скутерлері қатар жүретінін жазған.

Жақында «Жаңа Алакөл» -  курортының  бас жоспары Түркия мен Мысыр стандарттары бойынша әзірленетіні туралы жазғанбыз. 

2023 жылы Алакөл жағасынан күніне 10 тоннадан астам қоқыс шығарылды.