Алаяқтардың айласы: Ардагер журналист Кәкен Қамзин үйінен айырылып қалуы мүмкін

Алматыда белгілі журналист, профессор Кәкен Қамзин жәбірленуші ретінде тіркелген қылмыстық іс бойынша тергеу жүргізіліп жатыр, деп хабарлайды Orda.kz.

Құқық қорғау органдарының мәліметінше, оны белгісіз біреулер алдап, үйін сатып, ақшасын үшінші тұлғаларға беруіне себепші болған.

Танымал PR-маманы Айбар Олжаевтың айтуынша, күдіктілер алдымен коммуналдық қызмет өкілдері ретінде хабарласып, ардагердің жеке деректерін алған. Кейін Ұлттық қауіпсіздік комитетінің атын жамылып, мүлікке қатысты қауіп барын айтып, үйді шұғыл сатуға көндірген. Ақшаны Ұлттық банктің арнайы шотына салу қажет деген уәжбен, профессор нотариус арқылы үйін сатып, қаражатты алаяқтардың курьеріне табыстаған.

Қазір бұл дерек бойынша Алматы қаласы Әуезов аудандық полиция бөлімінде қылмыстық іс қозғалды. Пәтерді сатып алған жаңа меншік иелері үйге бірнеше мәрте келіп, жәбірленушіге қысым көрсеткені хабарланды.

Олжаевтың айтуынша, профессор үйінде бекініп, өз қауіпсіздігінен алаңдап отыр. Кәкен Қамзин бұл жағдайды өзі де растады.

«Мен қартайған адаммын. Айбардың айтқаны шындық. Арбауға түсіп қалдым. Тап қазір үйді сатып алған адам полициямен келіп, “үйді босат, әйтпесе МЧС әкеліп бұзып көреміз” деп кетті. Сіздердің жедел көмектеріңіз керек. Тоқтатыңыздаршы аналарды. Бір ай мұрсат сұрасам, сатып алушы көнбей қойды», – деді ол.

Қоғам белсенділері мен журналистика қауымдастық бұл іске назар аударып, профессордың мүддесін қорғауға шақырды. Заңгерлер мәмілені сот арқылы заңсыз деп тану жолын қарастырып жатыр.