Ақтөбеде жалған түбіртек жасаған мектеп есепшісінің үстінен қылмыстық іс қозғалды

Ақтөбенің атышулы Шалқар ауданы тағы да құзырлы органдардың назарына ілікті. Бұл жолы мектеп есепшісі 21 млн теңгеге жалған түбіртек жасады деген айып бойынша күдікті деп танылды, деп хабарлайды Orda.kz.

Ақтөбе облысы бойынша ішкі мемлекеттік аудит департаменті Шалқар ауданындағы №5 мектеп-лицейінен 51,4 млн теңге болатын қаржылық бұзушылықты анықтады. 

«№5 мектеп-лицейінің бас есепшісінің 2022-2024 жылдар аралығында қызметкерлерге 21,4 млн теңге артық жалақы аударғаны анықталды. Кейін заңсыздықтардың жойылғанын, ақшаның бюджетке қайтарылғаны туралы түбіртектер тапсырылды. Бірақ олар да тексерілді», — деді Ақтөбе облысы бойынша ішкі мемлекеттік аудит департаментінің басшысы Сәкен Қасымов.  

Департамент мектеп есепшісі тапсырған түбіртектерге күмәнмен қарайды.

2025 жылдың шілдесінде аудандық қаржы бөлімінен түбіртектегі ақшаның түскенін растауды сұрайды. Нәтижесінде бірнеше түбіртектің жалғандығы анықталды.

Аудитқа есепші 2024 жылдың 13 тамызында қазынаға 5 млн 27 мың теңге аударылды деген түбіртек көрсеткен. Бірақ қазынаға 527 мың теңге ғана түскен. 5 жүз мың теңгелік түбіртекке қосымша «0» салу арқылы 5 млн теңге деп өзгертіп жібергені белгілі болды.

Тағы бір түбіртекте 4,9 млн теңге төлем жасалды деп көрсетілген. Түскен ақша 4 млн теңге. «0» саны 9-ға өзгертілген. Осындай бірнеше түбіртек бар. 
Аудит анықтаған заңбұзушылықтар нәтижесі білім бөліміне жолданды. Шалқар аудандық білім бөлімі бұл мектептің директорына тек «сөгіс» беріп, тәртіптік жазаға тартумен шектелді. Есепші жұмыстан шығып кеткен. 

Бұл заңбұзушылықтар құзырлы органдарға жолданды. Бүгінгі күні бас есепшіге қатысты қылмыстық іс қозғалғаны белгілі болды.

Еске сала кетсек, Ақтөбе облысы Шалқар ауданының әкімі Жанболат Жидехановтың есімін қол астындағы қызметкері сотта бірнеше рет атады. Мердігерлерді қорқытып, пара алды деп айыпталған шенді әкімнің тапсырмасын орындағанын айтты. 

Автор: Ардақ Ерубаева