Ақтөбеде нағашы апайынан құқай көрген 5 балаға әкім пәтер береді

Халықтан, Тоқаевтан көмек сұрап, бейнеүндеу жариялаған 5 балаға Ақтөбе облысының әкімі Асхат Шахаров пәтер береді. Бұған дейін балалардың үлкені әкелерінің ішімдікке салынғанын, ал аналарының психиатриялық ауруханаға жатқызылғанын айтқан болатын, деп хабарлайды Orda.kz.

Ақтөбе қаласында жалғызбасты әйелдің 5 баласы қиын жағдайға тап болды. Балалар халықтан, Тоқаевтан көмек сұрап, бейнеүндеу жасады. Бейнежазба әлеуметтік желілерде тарап кетті. Онда жалғызбасты әйелдің бұрынғы күйеуі мен өз туыстарынан қысымға ұшырағаны жазылған. 

«Бес баланы орналастыру керек. Қалған мәселелерді де қолға аламыз, одан бас тартпаймыз. Біз үшін ең маңыздысы – олардың болашағы. Егер заңбұзушылық болса, кінәлілер жауапқа тартылады. Балалардың тағдыры тікелей бақылауымда болады», — деді өңір басшысы.

Айта кетейік, Ақтөбеде нағашы апайынан «қысым көрдік» деген балалар бейнеүндеу жасап, президенттен көмек сұрады. Балалардың айтуынша, анасының жүйке аурулар ауруханасына түсуіне нағашы апайы кінәлі.