Ақтөбеде құны жарты миллион болатын субұрқақ салынып жатыр

Ақтөбеде 454 миллион теңгеге салынып жатқан субұрқақ қыркүйек немесе қазан айында іске қосылады. 

Бұл туралы жергілікті «Диапазон» хабарлады.

Қазіргі таңда субұрқақ ашылатын саябақта жұмыс қызу жүріп жатыр. Бұған дейін қала әкімдігінің баспасөз қызметі субұрқақтың ашылу салтанатына байланысты ауқымды жұмыс жоспарланып отырғанын айтқан болатын.

«Саябақтың трансформаторлық қосалқы стансасының қуатын арттырып, одан кейін лазерлік және от шоуы бар жарық және музыкалық субұрқақ жабдықтарын, аудиожүйе орнатуды жоспарлап отырмыз. Мердігер – «Ақжол» ЖШС құрылыс-монтаж жұмыстарын жүргізіп жатыр», деп хабарлады қала әкімдігінің баспасөз қызметі.

Ал қала тұрғындары аталған субұрқаққа жарты миллионға жуық қаражат жұмсалғанына наразы. Желіде «Әкімдік мүлдем ойлауды қойды. Қалада, әсіресе аймақта миллиардтаған мәселе бар, бірақ оларға шоу қымбатырақ. Оның қанша екенін елестету қиын – 500 миллион теңге, калькулятор істен шығады» деген пікірлер бар.