Ақтөбеде ерлі-зайыптыларды қағып өлтірген полицейдің үстінен іс қозғалды

Жол апаты оқиғасы биылғы жылдың шілде айында болған. Үш және төрт жасар екі бала ата-анасыз қалды. Қайтыс болған Шыңғыс пен Динара небары 25 жаста еді, деп хабарлайды Orda.kz тілшісі.

Полиция майорына екі бап бойынша айып тағылып отыр. «Абайсызда екі адамның өліміне әкеп соққан жол қозғалысы ережесін мас күйде бұзу» - оған сәйкес полиция майорын 5 жылдан 10 жылға дейін бас бостандығынан айыру жазасы күтіп тұр. Сондай-ақ «жол-көлік оқиғасы болған жерден кетіп қалу» бабы бойынша 2 жылға дейін бас бостандығынан айыру жазасы қарастырылған. 

«Жүргізуші Азамат Орынбекұлы Симанов, 1990 ж.т., көлік құралын алкогольге мас кезінде басқаруға Қазақстан Республикасының жол қозғалысы ережелерімен тыйым салынғанын біле тұра, масаң күйде сағатына 121 шақырымнан астам жылдамдықпен жүріп, велосипедпен келе жатқан Кенжебай Шыңғыс пен Несіпбаева Динара Бақытбекқызын көлікпен қағып кеткен», - деді мемлекеттік айыптауды оқыған Ақтөбе прокуратурасының аға прокуроры Сәкен Бертілеуов. 

Тергеу анықтағандай, сол бір қайғылы түні жас жұбайлар туыстарына қонаққа келген. Түнгі сағат бірге таяу олар велосипедке мініп, көрші ықшамаудандағы үйлеріне қарай бет алған. Жолда оларды Kia көлігімен 34 жастағы мас полицей қағып кеткен. Онымен қоймай, тоқтамастан көлікпен жол апаты болған жерден кетіп қалған. Полицеймен бірге көлік ішінде оның ұлы болғаны белгілі болды.

Марқұмдардың мәйіттері түнде табылды. Олардың туыстары, егер дер кезінде көмек келсе, ерлі-зайыптыларды аман алып қалуға болатын еді, өйткені апат орнынан 100 метр жерде жедел жәрдем станциясы бар еді дейді. Келесі отырыс 3 желтоқсанға жоспарланған. Процеске қатысушылар түсініктеме беруден бас тартты.