Ақтөбе облысында келінін зорлаған қайын ата 8 жылға сотталды

Ақтөбе облысында қырқынан шықпаған баласы бар келінін 53 жастағы қайын атасы зорлап, 8 жылға бас бостандығынан айырылды, деп хабарлайды Orda.kz.

Сот процесі барысында ер адамның екі баласы бар келінін зорлағаны толық дәлелденді.

Алға аудандық соты ер адамды Қылмыстық кодекстің 120-бабы 1-бөлігі (Зорлау) бойынша кінәлі деп таныды. Тергеу материалдарына сәйкес, сотталушы мас кезінде келінін еркінен тыс жыныстық қатынасқа мәжбүрлеген.

Сотталушы өз кінәсін мойындамады. Дегенмен жәбірленуші мен куәгерлердің айғақтары, сондай-ақ сот-биологиялық сараптаманың қорытындысы оның қылмыстық әрекетін толықтай айғақтады.

Сот ер адамды 8 жылға бас бостандығынан айыру туралы үкім шығарды.

Еске сала кетейік, бұған дейін Orda.kz бұл жантүршігерлік оқиға туралы жазды. Ол келіні үйінде жалғыз қалған сәтті пайдаланып, оған күш көрсеткен. Сол кезде жәбірленушінің бар болғаны 22 жаста екені және оның босанғанына көп уақыт өтпегені айтылған еді. Тіпті сәбиі әлі қырқынан да шықпаған болатын.

Автор: Ардақ Ерубаева