«Ақшамды қайтарсын»: Қостанайда құрылысшы өзін өртемек болды

Қостанайдағы құрылыс алаңында наразылық, жұмысшы өзін өртемек болып, тікелей эфирге шықты, де хабарлайды Orda.kz.

«Наша газета» басылымының мәліметінше, бұған дейін де осы құрылыс алаңында үш жұмысшы наразылық білдірген екен.

Қостанай қаласындағы Победа көшесі, 70А мекенжайындағы аяқталмаған тұрғын үйдің жоғарғы қабатындағы құрылыс платформасына бір жұмысшы шығып, екі сағаттан кейін өзін өртейтінін мәлімдеді. Ер адам қолына «Көмек керек» және «Ақшамды қайтарсын» деген жазуы бар картон плакаттар ұстап, оқиғаны тікелей эфирде көрсетіп жатыр.

Оқиға орнындағы куәгерлер мен полиция өкілдерінің айтуынша, ер адам құрылыс компаниясынан жалақысын ала алмаған. Ол балаларын айтып, өзінің ақшасын қайтаруды талап етті. Биікте тұрған соң, оның нақты талаптарын есту қиынға соғып жатыр.

Қостанай облысының полиция департаментінің мәліметінше, қазір құрылыс компаниясының қызметкерлерімен келіссөз жүргізіліп жатыр.

«Оқиға орнында барлық қажетті жедел және тиісті қызметтер жұмыс істеуде. Құрылыс компаниясы қызметкерлерімен келіссөздер жүргізілуде, компания басшылығы да оқиға орнында жүр. Алдын ала мәлімет бойынша, жанжалдың туындауына жұмысшыларға жалақы төленбеуі себеп болған. Қазіргі таңда жалақы төлеу мәселесі шешіліп жатыр», деп мәлімдеді полиция департаменті.