АҚШ-та әйгілі Гранд-Каньон өртеніп жатыр: 500-ге жуық турист эвакуацияланды

АҚШ-тың Аризона штатында орналасқан ұлттық саябақ Гранд-Каньонның оңтүстік-батыс бөлігінде орман өрті тұтанды, деп хабарлайды Orda.kz.

Өрт бейсенбі күні кешке тұтанып, жұмаға қараған түні саябақ әкімшілігі шамамен 500 туристі шұғыл эвакуациялауға мәжбүр болған. Сондай-ақ саябақ қызметкерлері мен жақын маңдағы тұрғындар да қауіпсіз жерге көшірілді.

Полицияның мәліметінше, эвакуацияланғандардың басым бөлігі — шатыр тігіп демалып жатқан саяхатшылар.

«Бұл өңір — таулы шөлейт, ашық орманды алқап. Көбіне демалушылар мен лагерьлер пайдаланатын аумақ», — деді жергілікті полиция өкілі Джон Пакстон.

Қауіпсіздік мақсатында Гранд-Каньонның солтүстік бөлігіне де уақытша кіруге тыйым салынды.

Алдын ала мәлімет бойынша, өрт найзағай соққысынан тұтанған. Құрғақ ауа райы мен ауыспалы жел бағыты өртті сөндіру жұмысын қиындатып отыр.

Жергілікті билік қазіргі таңда 3500 гектардан астам аумақтың отқа оранғанын мәлімдеді.

Бұл — биылғы АҚШ-та тіркелген алғашқы ірі өрт емес. Қаңтар айында Лос-Анджелес маңында 37 мың акр (шамамен 15 мың гектар) аумақ жанып, бірнеше елді мекен мен 12 мыңнан астам ғимарат жойылды. Сол жолғы апатта көптеген адам көз жұмды.