Ақмола облысында балалар футбол командасы бар автобус аударылып, жаттықтырушы қаза тапты

Жол-көлік оқиғасы 18 сәуірде болды. Шағын автобустың салонында 14 пен 16 жас аралығындағы 16 бала және 1990 жылы туған жаттықтырушы болды. Ол көлік ішінде қысылып қалып, алған жарақатынан оқиға орнында қайтыс болды, деп хабарлайды Orda.kz.

«Астана-Ерейментау-Шідерті автожолында «Мерседес» маркалы шағын автобустың қатысуымен жол-көлік оқиғасы болды. Жүргізуші жүк көлігін басып озып, салдарынан автобус аударылып қалған деп болжануда», деп хабарлайды Ақмола облысы полиция департаментінің баспасөз қызметі.

Жасөспірімдер Павлодардан Астанаға спорттық жарысқа бара жатқан.

Барлық балалар медициналық мекемеге жеткізілді және дәрігерлердің бақылауында.

«Жеті кәмелетке толмаған бала ауруханаға жатқызылды, олардың біреуі - реанимация бөлімде. Нейрохирургтің кеңесімен симптоматикалық емдеу ұсынылды. Қалған алтауы жеңіл және орташа дәрежедегі жарақаттарымен хирургиялық бөлімшеге орналастырылды. Ауруханаға жатқызылғандардың жағдайы тұрақты. Жағдай бақылауда», деп хабарлады Ақмола облысының денсаулық сақтау басқармасы.

Қылмыстық іс қозғалды, тергеу амалдары жүргізілуде.

Облыстық ІІД хабарлағандай, жеке меншік спорт мектебінің басшылығы жол жүру туралы полицияға хабарламаған, сондықтан патрульдік көліктердің  еріп жүруі ұйымдастырылмаған.