Әкім мен әкелік дау: Маңғыстау облысының әкімі некесіз баласының әкесі екені сот шешімімен расталды

Маңғыстау облысының әкімі Нұрдәулет Қилыбай ақыры ресми түрде облыстық мәслихаттың бұрынғы депутаты Ынташ Наурызованың ұлының әкесі деп танылды, деп хабарлайды, Orda.kz.

Әкімнің жеке өмірі мен әкелік мәселесі төңірегіндегі елге жайылған әңгімеге сот нүкте қойды. Бұған дейін, Наурызованың облыс әкімі Нұрдәулет Қилыбайдан 2022 жылы бір ұл туғанын айтып,  ол әкелігін мойындамады деп сотқа берген еді. Наурызова әлеуметтік желілерде ашық мәлімдеме жасап, үш жасар ұлы Әмре Наурыздың әкесі — облыс басшысы екенін айтты. Оның сөзінше, Қилыбаймен арада романтикалық қарым-қатынас болған, алайда бала дүниеге келген соң шенеунік өмірінен ғайып болған. Өз кезегінде әкім бұл айыптауларды тек бір рет жоққа шығарып, оларды «шындыққа жанаспайды» деп қысқа ғана қайырған еді. 

Енді міне, Кәмелетке толмағандар ісі жөніндегі сот дауды түйіндеді. Әкім Нұрдәулет Қилыбай ресми түрде облыстық мәслихаттың бұрынғы депутаты Ынташ Наурызованың ұлының әкесі деп танылды. Қилыбай бала кәмелетке толғанға дейін ай сайынғы жалақысының төрттен бір бөлігін алимент ретінде төлеуге міндеттелді.

Бұл оқиға өңірден тыс жерлерде де кеңінен талқыланды. Бұған дейін Наурызова президент Тоқаевқа ашық хат жазып, өзін қорқытып, үнсіз қалдыруға тырысып жатқанын мәлімдеген. Ол бір жыл бойы түрлі мекемелерге жүгініп, ДНҚ сараптамасын өткізу мен әкелік құқығын ресми түрде мойындатуды талап етті. Енді баланың туу туралы куәлігіне өзгерістер енгізілуі тиіс.