Ақбөкеннің мүйізін сатқан ақтөбелік азаматқа 5 млн теңге айыппұл салынды

Желіде ақбөкен мүйізін сату туралы хабарландыру анықталған соң, 62 жастағы ақтөбелік азаматқа қатысты қылмыстық іс қозғалды.

Ақтөбе тұрғыны қоқыс жәшігінен ағаш cияқты бұралған ақбөкен мүйіздерін тауып алғанын айтты. Ол мүйіздерді  саудаға шығарды. Полиция қызметкерлері сатып алушы ретінде әрекет етіп, ер адамды ұстады. Оған мүйізді заңсыз сақтағаны үшін айып тағылды.

Сотталушы КСРО кезіндегі көне бұйымдарды сатумен айналысады. Көшеден небір жәдігерлерді тауып алып, қалпына келтіріп, кейін сатуға қояды.

Айта кетейік, сату туралы хабарландыру полицейлердің қызығушылығын оятқанға дейін жарты жылдай интернетте ілулі тұрған.

Сот 5 миллион 175 мың теңге айыппұлға қоса, антиквариат сатушыны 3 жыл 6 айға бостандығын шектеу жазасына кесті.