«Әйелі мен 3 баласын тентіретті»: Пәтерді сатып ғайып болған подполковниктің былықтары

Алматыда полиция қызметкері кәмелетке толмаған үш баласын  баспанасыз қалдырды. Әйелі Динараның айтуынша подполковник қарызға белшесінен батып, әйелінің рұқсатынсыз бір үйді екі адамға сатып жіберген. Үш баламен далада қалған Динара жан-жақтан қысым көріп, әділдік іздеп жүр. Orda.kz подполковниктің жұбайымен тілдесіп, оқиғаның мән-жайын біліп қайтты. 

Алматы қалалық полиция қызметкері, подполковник Якубов Нұрлыбектің әйелі Динараның айтуынша, ортақ баспананы әу баста мемлекеттен жалға алған. 

«Бұл баспананы күйеуімнің арқасында алдық. Комуналдық қызметтерге қарыз болып кеттік. 2021 жылы сол қарызымен бізді тастап, басқа әйелге кетіп қалды. Тұрғын үй департаменті бізді сотқа беріп, үйді тартып алмақ болды. Біз бар қарызды құйып, үйді алып қалдық», — дейді әйелі Динара.

Жалдамалы үйдің 50 пайызын құйып, 50 пайызын несие жүйесімен аударуға мамандар кеңес берген. Адвокат іздеп табанынан тозған Динараға білікті адвокат мемлекеттің жалға берген үйі несиеге аударылмайтынын айтқан.

«Біз ол кезде жолдасыммен ажырасып кеткенбіз. Адвокат күйеуіңізбен келісімге келіп, некеге тұрып, мүмкін бөлісіп аларсыздар деді. Сөйтіп 50 %-ын құйғанымызда күйеуім 1,5 млн теңге қайта қарыз болып қалған. Бізге тұрғын үй департаменті қайта хабарласа бастады. Ол ақшаны да төледім», — дейді далада қалған әйел. 

Күйеуі заңды некеге тұруды ұсынып жүрген. Алайда әйелдің күйеуіне сенімі болмаған. Десе де отбасындағы адам басына төленетін пәтерақыға бола әйел қайтадан заңды некеге тұрған. Бірақ пәтерақысын да, еңбекақысын да күйеуі бермеген.

«Күйеуім үйге ақша әкелмейді. Өзі бірге тұрып жүр. Кейін ол: «үйдің ақшасын толық төлеп тастадым, үйді сатып алдым» деді. Каспийден қарасам, үй балаларымның атында тұр екен», — дейді Динара.

Баспанасының сатылатынын Динара көршілерінен естіген. Олар хабарландырудан көрген. Қысқасы Алматы қалалық полиция қызметкері, подполковник Якубов Нұрлыбек әйеліне айтпай, үйді сатып жіберіп, үш баласын далада қалдырған көрінеді.

«Үйді екі адамға сатқан. Мен еш нәрседен хабарым жоқ. Сот орындаушы келгенде ғана баспанасыз қалғанымды білдім. Сот орындаушы шығасыздар деді. Сөйтіп он шақты адам келіп мені күштеп шығарғалы тұр. Мен 102 нөміріне хабарластым. Есікті ашпай қойдым. Есікті бұзып, қолымда күштеп ұстап алған. Біреуі камера ұстап келді, көшеде өрт сөндірушілер тұр», — деді Динара. 

Ол үйдің иесі деген адам да, мамандар да қоқан-лоққы көрсеткенін айтты.

Динара заңды некеде болған кезде жұбайының отбасын тастап, басқа әйелге кеткені жанына қатты батқанын мәлімдеді.

Orda.kz редакциясы осы оқиға бойынша полиция департаментіне сауал жолдаған болатын.

«Н.Якубов ішкі істер органдарының қызметкері емес. Ол бұрын жұмыстан босатылған.
Сонымен қатар, бұл азаматқа қатысты қандай да бір шағымдар полиция департаментіне түспегенін хабарлаймыз», деп жауап берді полиция басқармасы.

Айта кетейік, Orda.kz тілшісі Қызылордада аяғы ауыр әйелін соққыға жыққан бұрынғы полиция қызметкері жайлы жазған еді. Оқиға болған күні полицей майор шенін алып, үйіне шылқа мас болып келген. Әйелін ұрып-соғып артынан буындырған. Жас жұбайын буындырып «өлтіріп алдым» деп ойлап үшінші қабаттан лақтырып жіберген. Толығырақ тілшіміздің мақаласынан оқыңыз.