Адвокат Мұрат Адамның сотында жарыссөз басталды: Судья Бажкенованы шақырудан бас тартты

15 қаңтар күні Алматыда адвокат Мұрат Адамды лицензиясынан айыруға қатысты сот процесінің төртінші күні өтті. Сот отырысы таңғы сағат 10:00-ден кешкі 21:00-ге дейін жалғасып, қорғаушылар тарапының наразылығын тудырды. Адвокаттардың айтуынша, қолданыстағы ережелерге сәйкес бір сот отырысының ұзақтығы 4 сағаттан аспауы тиіс.

Orda.kz тілшісі сот отырысына қатысып қайтты.

Күннің бірінші жартысында сот іс материалдарын зерттеді. Осы ретте Orda.kz басылымының негізін қалаушы әрі теңқұрылтайшысы Гүлнәр Бажкенованы сотқа шақыру қажеттігі туралы өтініш қайта көтерілді. Алайда судья бұл өтінішті қанағаттандырудан бас тартты.

«Оны сотқа шақырудың қажеті жоқ, оның құқықтары бұзылып отырған жоқ. Ол адвокатты ауыстыруға құқылы», – деді Дәурен Тілеубаев.

Сонымен қатар судья іс материалдарына филологиялық сараптама жүргізу туралы өтінішті де қабылдамады. Азаматтық істің жеделдетіп қаралуына байланысты күннің екінші жартысында тараптардың жарыссөзі басталды.

Қорғаушылар бұрынғы отырыстарда алға тартқан уәждерін қайта келтірді. Олардың пайымдауынша, егер заң талаптары немесе адвокаттардың кәсіби этика кодексі бұзылғаны жөнінде жеткілікті негіз болса, азаматтық іс емес, тәртіптік өндіріс қозғалуы тиіс еді. Қорғаушылар бұл мәселені азаматтық іс тәртібімен қарап, лицензиядан айыруды — қате әрі шектен тыс қатал шара деп санайды.

Сот шешімі 16-қаңтар сағат 16:00-де белгілі болады.

Еске сала кетейік, Алматы қаласындағы сотта Мұрат Адамды лицензиясынан айыру туралы Әділет министрлігінің талап-арызы қаралып жатыр. Отырыс барысында сотқа әлеуметтік желілер мен БАҚ-та жарияланған 16 материал ұсынылды. Алайда адвокаттың өзі бұл материалдардың бір бөлігінің оған еш қатысы жоқ екенін мәлімдеді.