Абай облысында оқушы ақылды бесік ойлап шығарды

Абай облысында мектеп оқушысы ақылды бесік ойлап тапты, деп хабарлайды Orda.kz Қазақпаратқа сілтеме жасап.

Облыстық білім басқармасы жас өнертапқыштың Бесқарағай ауданындағы Борасын орта мектебінің 11-сынып оқушысы Кирилл Козлов екенін айтты.

Ақылды сәби бесігі ата-аналарға Android қолданбасы арқылы сәбилерін бақылауға мүмкіндік береді. Ол бірнеше функцияларды қамтиды - бесікті тербету, тыныштандыратын музыка ойнату, температура мен ылғалдылықты өлшеу және т.б.

«Бала жылаған кезде бесік баланың жылағанын бірден сезіп, тербетіп ұйықтатады. Ол сондай-ақ бесіктегі ылғалдылық деңгейін өлшеп, ата-ананың телефонына баланың жаялығын ауыстыру керектігі туралы сигнал береді»   деп хабарлады білім басқармасы.

Кирилл музыка ойнатқышты, түнгі аспан проекциясын және жарықтандыру қосқан. Ол қазір баланың ұйқысын қадағалай алатын тыныс алу немесе жүрек соғу жиілігін қадағалау сияқты сенсорларды біріктіру арқылы ұйқы бақылағыш орнатумен айналысуда.

Ендігі жерде қолдаушылар табылып, жоба іске асып жатса,  ата-аналар сәбиінің жағдайын алаңсыз қадағалай алатын болды. Оқушы жобасының жетекшісі – информатика пәнінің мұғалімі Арай Жұматаева.