Абай Бегейдің қызы мен күйеу баласы істі болды

Әнші Абай Бегейдің қызы Гүлеркем Ниязқұлова мен күйеу баласы заңсыз онлайн-лотерея ұйымдастырғаны үшін  істі болды, деп хабарлайды Orda.kz.

Қаржылық мониторинг агенттігінің (ҚМА) мәліметінше, ерлі-зайыпты Instagram, TikTok және Telegram желілерінде 850 мыңнан астам жазылушысына ұтыс ойындарын ұсынған. Алайда тіркелген лотерея операторы болмаған. Соған қарамастан, олар автокөлік, пәтер және басқа да бағалы сыйлықтар ойнатылған ұтыс ойындарын өткізген.

«Ұтыс ойынына 1800-ден астам азамат қатысқан. Заңсыз қызметтен түскен қылмыстық кіріс көлемі 162 млн теңгеден асты. Қазіргі уақытта күдіктілердің мүлкі мен банктегі шоттарына тыйым салынды. Сотқа дейінгі тергеу жүріп жатыр»,  деп хабарлады агенттік.

Еске салайық, бұған дейін Абай Бегейдің 9-сыныпты енді ғана бітірген қызының тұрмысқа шығуы қоғамда қызу пікірталас туғызған болатын.