«5 жігіт есірткі беріп, зорлаған»: Ақтауда бойжеткен өзіне қол жұмсады

Ақтауда тұрмыс құрмаған жас қызды 5 жігіт зорлап, есірткі берген. Әрі оның атына несие рәсімдеген, деп хабарлайды Orda.kz.

Бұл туралы ақпарат nemolchikz_official инстаграм парақшасында тарады. Оқиға 2024 жылдың мамыр айында болған. Ал 2024 жылдың соңында марқұм қыздың туыстары сот шешіміне келіспейтінін айтып, дау шығарды. 

Бойжеткен спортпен айналысып, фитнес - жаттықтырушы болып қызмет атқарған. 14 мамыр күні  түнде жұмыстан қайтып бара жатқан қызды бір топ ер адам көлікке қинап отырғызған. Оған мефедрон беріп, қызды көлік ішінде зорлаған. Зорлаушылардың бірінің баласы бар, отбасылы жігіт екені анықталды. Қызды таңға дейін зорлаған жігіттер, оның телефоны арқылы 2 млн теңге несие рәсімдеп, қалталарына басқан.   Зорлаушылардың бірі қызды қалаға алып келіп, болған оқиғаны біреуге айтса «өлтіретінін» ескерткен. 

Бойжеткен болған оқиғаны құрбысына айтады. Ал құрбысы барлық жағдайды дереу оның ағасына жеткізген. Қыздың ағасы оған хабарласып, полицияға арыз жазу керегін, істің соңына дейін жанында болатынын айтып қолдау білдірген. Қыз келіскендей болған. Бірақ бірнеше минуттардан кейін қыз құрбысының көзінше терезеден секіріп, мерт болды. 

Енді жазықсыз мерт болған қыздың туыстары сот шешіміне келіспейді. 

Бас ұйымдастырушыға прокурор өмір бойына бас бостандығынан айыруды сұраған. Қалған төртеуі 15-16 жылға сотталуы керек еді. 

Прокуратура оларды зорлау, жыныстық сипаттағы зорлық-зомбылық, өзін-өзі өлтіруге дейін жеткізу, есірткі заттарын қолдануға көндіру, есірткі заттарын заңсыз пайдалану, заңсыз бас бостандығынан айыру, адам ұрлау, бопсалау баптарымен айыптады. 

Бірақ судья Досетов Инятулла сот процесінде айыптауларды қайта жіктеді.

Судья қыздың өлімін зорлықпен байланыстырмады. Ол өлімнің зорлық болғаннан кейін 3 күн өткен соң болғанын алға тартты. Қыздың өзі терезеден секіріп, мерт болғанын айтты. Қыздың отбасы апелляциялық шағым түсірді.