«179 адамның өлімі»: Кореяда ұшақ апатының құлаған сәті бейнежазбаға түсіп қалды

Jeju Air әуе компаниясына тиесілі жолаушылар ұшағының Оңтүстік Кореяның Муан қаласындағы әуежайда құлаған сәті бейнеге түсіп, жергілікті MBC News телеарнасы жариялады. 181 адамнан тек 2 адамды құтқарып алды, деп хабарлайды Orda.kz.

Кадрлардан ұшақтың қону кезінде ұшу-қону жолағынан шығып, қоршауға соғылғанын көруге болады.

Телеарна апат орнынан тікелей эфир жүргізіп жатыр.

Әуе апаты таңғы сағат 9:07-де (Астана уақыты бойынша 5:07) болды. Бортта 175 жолаушы мен алты экипаж мүшесі болған. Олар Бангкоктан оралған. 

Ұшақ қатты зақымданып, соққыдан кейін өрт шыққан. Құтқару қызметтері өртті сөндіріп, қазір іздестіру-құтқару жұмыстарын жүргізіп жатыр.

Жолаушылар арасында 173 Оңтүстік Корея азаматы және екі Таиланд азаматы болған.

Yonhap ақпараттық агенттігінің мәліметіне сүйенсек, нақты 96 адамның мәйіті табылды. Әзірге тағы құтқару жұмыстары жүргізіліп жатыр. Қаза болғандар саны одан да көп болуы мүмкін.