15 жастағы «Ақтөбе» футболшысы Арон Мұса газға тұншығып қайтыс болды

Ақтөбеде жергілікті футбол клубының 15 жастағы ойыншысы Арон Мұса көз жұмды, деп хабарлайды Orda.kz.

Жасөспірімнің көмірқышқыл газына уланып қайтыс болғаны анықталды. Спортшының қазасы туралы футбол клубының баспасөз қызметі мәлімдеді.

«Кеше QJ league турнирінде ойнайтын «Ақтөбе U-16» командасының ойыншысы, 15-жастағы футболшы Арон Мұса өмірден озды. Аронның отбасында үлкен қайғы орнады. Арон бауырымызбен бірге әжесі және немере ағасы да көз жұмды. Мұса әулетіне, туған туыстарына қайғыра көңіл айтамыз»,  деп мәлімдеді футбол клубының баспасөз қызметі.

Төтенше жағдайлар департаменті бұл ақпаратты нақты растаған жоқ, бірақ жоққа да шығармады.

«Оқиға туралы хабар кеше кезекші бөлімге түсті. Оқиға орнына келгенде өрт белгілері болмады. Алайда үш адамның денесі табылды»,  деп түсіндірді Ақтөбе облысы ТЖД баспасөз қызметі.

Қазір сараптама тағайындалып, қазаның себебі анықталып жатыр. Полиция тергеу бастаған.

Еске сала кетйік, бұған дейін «Жеңіс» әйелдер командасының футболшысы Виктория Қайсаринова жол апатынан қайтыс болған еді.