13 жастағы баскетболшы ойын кезінде қайтыс болды

Атырауда AiRom академиясының 13 жастағы тәрбиеленушісі Абдулазиз Тасболат дәл ойын кезінде қаза тапты, деп хабарлайды Orda.kz.

Жасөспірім ойын алдында өзін жайсыз сезінген алайда өлімнің себебі әлі хабарланған жоқ. Болған оқиғаны AiRom академиясы өзінің ресми парақшасында мәлімдеді. Оның  талабы биік, еңбекқор спортшы екенін тілге тиек етті. Әзірге медицина қызметкерлері мен құзырлы органдардан ресми түсініктеме берілген жоқ.

«Абдулазиз жарқын жүзді, жүрегі таза, мақсаты айқын жан еді. Алаңда да, өмірде де нағыз күрескер болатын, өзін әрдайым еңбекқор спортшы әрі шынайы дос ретінде көрсете білді. Ол AiRom атты үлкен отбасының ажырамас бөлігі ретінде біздің жадымызда мәңгі сақталады. Марқұмның туған-туыстары мен жақындарына шын жүректен көңіл айтамыз. Қайғыларыңызға ортақпыз. Абдулазиз туралы жарқын естелік оны танып, қадірлеген әрбір жанның жүрегінде мәңгі қалсын» деп жазды AiRom өзінің Instagram парақшасына. 

Айта кетейік, осыдан 3 ай бұрын «Хан-Тәңірі» клубының 19 жастағы шабуылшысы Диас Төлеу «Екібастұзға» қарсы матчта футбол алаңында көз жұмды.