Жыл басталғалы 60 бала терезеден құлады – ТЖМ

ТЖМ жыл басынан бері 60 баланың терезеден құлағанын мәлімдеді, деп хабарлайды Orda.kz. 

Төтенше жағдайлар министрлігі көктем мен жаз мезгілінде, сондай-ақ жазғы мектеп демалысы кезінде жыл сайын осындай оқиғалар саны артатынын ескертті. Жыл басталғалы 60 бала терезеден құлап, оның бесеуі қаза тапқан. 55 бала түрлі жарақат алып, медициналық мекемелерге жеткізілген. Ал 2024 жылы осындай 196 оқиға тіркелген. 

ТЖМ әдетте терезеден 2 жастан 13 жасқа дейінгі балалар құлайтынын мәлімдеді. Көбінесе қайғылы оқиғалар балалар терезедегі торға сүйенген кезде болады екен. Ведомство басшысының тапсырмасы бойынша еліміздің барлық өңірлерінде профилактикалық жұмыстар күшейтілді. 

Айта кетейік, мамыр айының басында Ақтөбеде 3 жастағы бала 5-қабаттан құлаған еді.