Журналистердің телефон нөмірлері OLX.kz-ке шығып кетті: енді оларға күні-түні маза жоқ

Осы аптада Алматы мен Астанадан бірнеше республикалық БАҚ өкілдері ұялы телефондарына көптеген қоңырау легі арты-артынан түскеніне шағымданды, деп хабарлайды Opda.kz «Әділ сөзге» сілтеме жасап.

«Еркін сөз» қоры телефон шабуылының күшті болғаны сонша, журналистердің жұмыс істеуіне кедергі болғанын атап өтті. Қоңыраулар түнде де бес минут сайын келіп тұрған. БАҚ өкілдері бұл әрекетті оларға қысым көрсетудің бір түрі деп санайды.

Журналистердің нөмірлері OLX.kz платформасында жалған жарнамаларда жарияланған. Мәселен, Данияр Молдабековке алдымен күшік сату туралы сұрақтармен телефон соғып, кейін таксиге тапсырыс бергісі келгендер хабарласқан.

Журналист Нәзира Дәрімбет осыған ұқсас жағдайды айтып берді.

«Сосын менің әріптестерімде де дәл осындай мәселе бар екенін білдім. OLX-тен қоңырау жалғыз маған емес, біраз әріптестерімізге шалынған. Кеше кешкі уақыттан бері маған WhatsApp-қа қоңыраулар, хабарламалар келіп, менің арзан iPhone телефон сатумен айналысатынымды айтып жатыр. Осыған қатысты жарнаманы тауып алдым, оларға арыз жаздым, бірақ ол жарнама әлі ілініп тұр» деп жазды Дәрімбет әлеуметтік желіде.

Сондай-ақ, prodengi.kz редакторы Ирина Ледовских пен Forbes.kz журналисі Татьяна Панченко және тағы басқалар біреулердің жалған айыппен телефон соққанын хабарлады.

OLX.kz қолдау қызметі журналистердің шағымдарына жауап беріп, жалған жарнамаларды алып тастады, бірақ кейін жаңалары пайда болды. «Әділ сөз» мұндай әрекеттерді журналистердің заңды кәсіптік қызметіне кедергі келтіру деп бағаланып, бұл іс қылмыстық жазаға тартылады деп санайды.