ЖИ министрлігінің кейбір өкілеттігі ҰҚК бақылауына өтті

Қазақстан президенті Қасым-Жомарт Тоқаев жасанды интеллект және цифрлық даму министрлігінің бірқатар маңызды өкілеттігін Ұлттық қауіпсіздік комитетіне беру туралы жарлыққа қол қойды, деп хабарлайды Orda.kz.

Жаңа құжатқа сәйкес, ҰҚК ақпараттық-коммуникациялық инфрақұрылымның аса маңызды нысандарындағы мемлекеттік бақылау функцияларын өз мойнына алады.

«Қазақстан Республикасының Ұлттық қауіпсіздік комитетіне Қазақстан Республикасы Жасанды интеллект және цифрлық даму министрлігінің ақпараттық-коммуникациялық инфрақұрылымның аса маңызды объектілерінің ақпараттық қауіпсіздігі бөлігінде ақпараттандыру саласындағы мемлекеттік бақылауды жүзеге асыру жөніндегі функциялары мен өкілеттіктері берілсін» деп жазылған жарлықта.

Үкімет пен Ұлттық қауіпсіздік комитетіне тиісті заңнамалық түзетулер әзірлеу және Комитет туралы заңды жаңарту жүктелді. Жарлықтың орындалуын бақылау Президент әкімшілігіне тапсырылды. Құжат 25 желтоқсанда қол қойылған күннен бастап ресми түрде күшіне енді.

Бұл шешім Ұлттық қауіпсіздік комитетінің құзыретін кеңейтуге бағытталған соңғы кезеңдегі маңызды қадамдардың бірі. Бұған дейін президент ҰҚК-ның қаржылық мониторинг және мемлекеттік материалдық резервтерді басқару саласындағы өкілеттігін арттыратын жарлыққа қол қойған болатын.